Medico e Scrittore

Eneide, in siciliano
 

Vi cuntu l’abbinturi d’un Eroi
chi si partìu di Troia arsa e pirduta
e pi crapicciu di lu riu distinu
agghicau nna la rrina di Lavinio.
Appi a pàtiri assai lu mischineddu
Pi la gran raggia di la dea Giunoni
pi terra e mari e npaci e nna la verra.
Allistìu na cità e ci purtau
di Troia i patrunedda di la casa,
chi foru poi la rrera maistusa
di la razza latina e di chidd’autra
albana, e puru Romala Superba.
PUISIA, un mi fazzu pirsuasu
picchì tantu piniari li Troiani,
picchì la gran Riggina di lu celu
si misi ncapu u nasu stu mischinu
ch’era bonu, fideli e religgiusu.
Picchi tantu arraggiati su li Dei?
 

C’era la gran citati di li Tiri
nfacci propia a lu Tevere e a l’Italia
facci, luntanu, la ricca Cartagine
e pussirìa terrìbbili cannuna.
Giunoni l’arurava, ni scìa foddi
pi decimila voti cchiù di Samo
e ci tinìa li armi cu lu Carru.
Avissi poi vulutu chi Cartago
fussi la capitali di lu munnu.
E sapìa chi di lu sangu troianu
avissiru aggigghiatu -razza porcagenti
chi poi avissi scunucchiatu
li rocchi mpressiunanti di Cartago,
e accussì puru la putenti Libia.
(Era la scuddruriata di li Parche).
Scantannusi pi ddopu dea Giunone
e pinzannu a la verra sutta Troia
– ma sempri di la parti di l’Argivi!-
Giunoni patìa ancora autri scontrubbi:
lu gìurizziu di Paride e biddizza
misa sutta li peri e scapisata,
u rancuri contra a razza troiana,
l’anuranzi p’u frociu Ganimede.
Perciò tinìa arrassu li Troiani
sbattuliati di l’unna fora Lazio
chiddi ch si l’avianu fatta franca
di li Greci e d’Achille, sti culusi,
e currìanu – u Distinu assicutavapi
tant’anni, si viri ch’era rura
di frabbicari la genti romana.
 

Si la Sicilia cchiù nun si virìa
li Teucri si facìanu cuntenti,
ammuttavanu rrima e spampinàvanu
pussenti vili e cu li brunza a prua
fidduliavanu mari cu la scuma.
Giunoni c’avìa mpettu la firuta
li vitti, rici “M’aiu a cunsulari,
a stu puntu m’arrennu e dda granfigghia
di bona matri -Minerva – si nni rriri,
(virè lu re dei Teucri si nni futti).
Lu Distinu nun-moli, ma Minerva
la gran flotta di Greci la iardìu
li strafuttìu nn’o mari cchiù funnutu
– ci curpa sulamenti Aiace Oilèo-.”.
E idda stessa muddau di lu celu
li terribbili fòcura di Giove
straviau li navi, niminau l’unni,
scassau Aiace chi lanzava ciammi
du pettu furminatu e nna lu scogghiu
lu nfilau e lu mpalau comu un purpu.
“E iò chi caminu annaculiànnumi
-chi sugnu soru e mogghi di lu Capuvaiu
facennu la verra a un sulu populu
e nun m’a firu a mèttici u tistali.
Cu mi runa mpurtanza e cchiù mi
porta riali e sacrifici nna l’artaru?”

​

E’ accussì chi ncuttuma la gran Dea
e agghica drittu all’ìsula d’Eolia
dunni stanno li vèntura furiusi
chi li cuverna fermu lu re Eolo
signuri di furtura e di timpesti
chi temi priciuneri ncatinati.
Iddi vucianu comu dispirati
facènnucci trimari la muntagna.
Eolo è assittatu ncapu un scogghiu:
cu mmanu lu vastuni du cumannu
na paruledda e addiventanu manzi.
S’un facissi accussì li forti vèntura
scunfunnìssiru u mari cu li pisci.
Scantànnusi di chissu lu re Giove
li misi nna li ruttiì e misi ncapu
auti muntagni e ancora a cuvirnarli
l’abbilitusu e specialista Eolo.
Tinènnuli, abbiànnuli dipenni
di la nicissità.

​

Quannu agghicau
la vuci di Giunoni era piatusa:
“Siccomu lu gran patri di li Dèi
ti resi a tìa u cumannu di li vèntura,
c’è na razza c’un pozzu addiggiriri,
sta navicannu nna lu Mar Tirreno
e va versu l’Italia pi purtàricci
di Troia li patrunedda di la casa.
Abbìa li to vèntura, annèali
simina li Troiani mari mari.
T’a diri c’ àiu quattordici puddastri
di tutti la cchiù bedda è Deiopea,
ti la rialu – la cosa è pi sempri.
Ci fai l’amuri e idda di sicuru
di figghi ti nni fa na cunigghiata”.
“Chi discursa mi fai” – ci rissi Eoloputintissima
divina Riggina,
stu regnu tuttu tu mi l’addutasti,
tu sì la me patruna, attocca a tìa
cumannari di chiddu c’àiu a fari
e iò lu fazzu senza riri sguì”.
E cu lu peri di la lancia retti
un corpu micidianti a la muntagna,
e li vèntura si muddaru tutti
scatinànnusi pi tutta la terra.
Euro, Noto e gran Africo putenti
nzèmmula si capùzzanu nn’o mari,
sdirrùpanu lu funnu e poi ci mànnanu
li granni maraggiati nna la plaia.
Tantu spaventu nna li marinara,
vucìanu chi pàrinu viteddi
chi stàssiru scannannu e poi li cànnavi
tisi a lu ventu e nèuli niuri
mascarìanu u celu, chi trunìa
e lampi e trona un si cuntanu cchiù
la morti disgraziata è sempri ddrà.
Ed eccu, comu tutti, si scantau
Enea chi cu li manu versu i stiddi
rici: “Fratuzzi mei quant’era megghiu
mòriri battagliannu sutta Troia
ammazzatu d’Achilli lu cchiù forti
di li nostri nnimici e dunni puru
è urvicatu Ettore putenti,
e scurrinu Simoenta e Sarpedonte
e su urvicati nni iu mari funnu
elmi, armi, scudi, tantissimi eroi.